Buba Galadima, ɗaya daga cikin manyan shugabannin NNPP, ya ƙaryata gaba ɗaya zargin cewa Rabiu Kwankwaso zai shiga sahun Tinubu domin tallafa masa a zaɓen 2027, yana mai cewa irin mu’amalar gwamnatin tarayya da aka nuna wa Kano ba za ta bar hakan ya yiwu ba.
A lokacin da ya bayyana a shirin Politics Today na Channels Television, Galadima ya nuna takaicinsa da cewa, “Ba zai yiwu Kwankwaso ya zama abokin APC da yadda suka mu’amalance mu a Kano ba, musamman naɗa sarakuna biyu a cikin gari ɗaya”.
Ya zargi gwamnati da amfani da jami’an tsaro don rikitar da al’amuran sarauta a Kano, inda ya ƙara da cewa, “Suna da aƙalla motocin pick-up 40 cike da ƴan sanda masu sintiri suna tsaron sarkin (Aminu Ado Bayero)”.
Haka zalika ya ce akwai rahotannin tashin hankali inda, “A wasu wurare a Kano ana kashe mutane ana ƙwace wayoyinsu, ƴan sanda kuma an takura su”, abin da ya bayyana a matsayin matakin damfara ta siyasa.
Galadima ya yi fariyar cewa jam’iyyar NNPP ce za ta “tantance wanda zai zama Shugaban Najeriya a 2027”, tare da jaddada cewa har yanzu Kwankwaso bai sanar da shi ko zai rungumi APC ba.
Ya jaddada tarihin siyasar Kano a matsayin wani yanki mai ƙarfin jefa ƙuri’a, ya yi nuni da yadda ƙabilu da iyalai na sarauta suka taka rawa a siyasa, amma ya gargaɗi cewa babu wani sarki da zai zaɓi shugaba shi kaɗai.
A ƙarshe ya bayyana Kwankwaso a matsayin “ƙarfin siyasa” wanda ya ci nasara wajen ƙalubalantar APC a Kano, ya kuma yi gargaɗi ga masu tunanin ja da shi zuwa wani ɓangare.