Gwamnonin jihohi 36 na Najeriya sun haɗu don kiran a gaggauta janye sabuwar dokar haraji ta ƙasa, suna neman a nemi cikakkiyar shawarar juna kafin aiwatar da shirin shugaban ƙasa Tinubu na gyaran haraji.
Buƙatar gwamnonin, wadda aka bayyana a taron Majalisar Tattalin Arziki ta Kasa (NEC) karo na 144 ƙarƙashin jagorancin Mataimakin Shugaban Ƙasa Kashim Shettima, ta jaddada buƙatar samun haɗin kai duba da damuwar yankunan Najeriya.
Gwamna Seyi Makinde na jihar Oyo ya nuna damuwa kan rashin samun isasshiyar tuntuɓar masu ruwa da tsaki, yana mai jaddada cewa “haɗin kai tsakanin masu ruwa da tsaki” yana da muhimmanci kafin a ci gaba da batun dokar.
Taron ya bayyana damuwa sosai musamman daga gwamnonin Arewa waɗanda ke tsoron gyaran haraji da aka gabatar zai iya shafar zaman lafiyar tattalin arzikin jihohinsu.
Gyaran harajin, wanda kwamitin gyaran haraji na shugaban kasa ƙarƙashin jagorancin Taiwo Oyedele ke jagoranta, yana da nufin sauƙaƙa tsarin haraji na Najeriya, inganta tattara kuɗaɗen shiga, da samar da hukumar kuɗaɗen shiga ta ƙasa guda ɗaya.
Duk da waɗannan manufofi, shirin ya haifar da damuwa musamman kan sauya tsarin raba kuɗin Harajin VAT da aka samu a jihohin da aka tara, wanda zai karkatar da kaso mai yawa na kuɗaɗen shiga zuwa ga jihohin da ake samar da harajin.
Gwamnonin Arewa, ƙarƙashin jagorancin Gwamnan Jihar Gombe Muhammed Yahaya, sun bayyana cewa wannan canjin na iya haifar da rasa ayyukan yi da kuma cikas ga tattalin arzikin jihohinsu.
“Wannan gyara na iya kawo barazana ga zaman lafiyar yankin da kuma karfin tattalin arziki,” in ji shi, yana sake jaddada ƙudurinsu na kare muradun Arewa.
Fadar Shugaban Ƙasa ta yi iƙirarin cewa canje-canjen da aka gabatar za su inganta tsarin haraji ba tare da ƙara nauyin harajin ba, suna kuma da niyyar samar da ingantaccen tsarin rarraba kuɗaɗe fiye da ƙarin nauyi.
Duk da haka, Majalisar Dattijai ta ɗage tattaunawa kan dokar har zuwa 19 ga watan Nuwamba, inda wasu sanatoci suka amince da ra’ayin gwamnonin, wanda hakan ya sa aka dakatar da muhawara kan batun a Majalisar.
Gwamnonin Arewa sun ƙuduri niyyar sake haɗuwa don duba matakan da za su ɗauka, inda suka ce, suna nan a kan ƙudurinsu na kare muradun yankin Arewa cikin tsarin gyaran harajin na ƙasa.