A wani jawabi daga Lokoja, shugaban ƙungiyar shugabannin jam’iyyar African Democratic Congress (ADC) na jihohi, kuma shugaban jam’iyyar a Jihar Kogi, Kingsley Temitope Ogga, ya bayyana goyon bayan su ga jagorancin tsohon shugaban majalisar dattawa, Sanata David Mark, a matakin ƙasa.
Ogga ya gargaɗi jama’a da su yi hattara da shugabannin jam’iyyar na jihohin Benue da Nasarawa waɗanda ya ce suna iƙirarin cewa su ne ke wakiltar ƙungiyar shugabannin, alhali ba su da wani hurumin yin hakan.
Ya tabbatar da cewa ɗan majalisar da kaɗai aka zaɓa a karkashin jam’iyyar, Hon. Leke Abejide, ya ci gaba da kasancewa a dakace har abada saboda ayyukansa da ke cin karo da manufofin ADC.
“Muna nan, mu shugabannin ADC na jihohi 34 da FCT, muna sake jaddada amincewarmu ga jagorancin Sanata David Mark da sabon kwamitin NWC da yake jagoranta,” in ji Ogga cikin sanarwar.
- JIGAWA: Garko Ta Haɗejia Na Cikin Damuwa, Ɗaruruwan Almajirai Da Iyalai Sun Rasa Matsugunnai Sakamakon Mamakon Ruwan Sama
- KATSINA: Aƙalla Mutane 50 Ne Suka Mutu a Hare-Haren Malumfashi
- BORNO: Ƴan Boko Haram Sun Kashe Jami’an Tsaro Sun Yi Garkuwa Da Wasu A Konduga
- Sanata Wadada Ya Bayyana Ficewa Daga SDP Saboda Rikicin Da Ya Ƙi Ci Ya Ƙi Cinyewa
- TATTALIN ARZIƘI: Ajiyar Kuɗin Waje ‘Foreign Reserve’ Na Najeriya Ya Kai Dala Biliyan 41 – Fadar Shugaban Ƙasa
Ya zargi shugabannin jam’iyyar na Nasarawa da Benue ɗaukar nauyin yaɗa labaran ƙarya a kafofin yaɗa labarai don ɓata sunan jagorancin jam’iyyar.
Ogga ya yi iƙirarin cewa Abejide na ƙoƙarin miƙa jam’iyyar hannun APC a asirce ne kafin zaɓen 2027, abin da ya kira babban cin amanar jam’iyya.
“Tun daga 2023, mun samu rahoton yawan ayyukan cin amanar jam’iyya da ƙoƙarin ƙwace ikon gudanar da taro ba tare da izinin shugabannin ƙasa ko na jihar Kogi ba,” in ji shi.
Wannan rikici na cikin gida ya ƙara janyo hankalin jama’a kan irin tasirin da rarrabuwar kai ke yi ga ƙarfin jam’iyya.
Masu sharhi sun ce irin wannan furuci na iya zama gargaɗi ga duk wani mai ƙoƙarin karkatar da jam’iyya zuwa wata manufa ta daban.